Үкімет отырысында келесідей мәселелер бойынша сөз қозғалды
Ұшу қауіпсіздігі – Қазақстанның азаматтық авиациясындағы негізгі басымдық.
Халықаралық азаматтық авиация ұйымының (ИКАО) бағалауы бойынша Қазақстандағы ұшу қауіпсіздігінің көрсеткіші 82%-ды құрайды, бұл орташа әлемдік деңгейден – 70,8% едәуір жоғары. Мұндай мәліметтерді Үкімет отырысында көлік вице-министрі ТалғатЛастаев айтты. Өткен жылы Еурокомиссия Қазақстан авиакомпаниялары үшін Еуроодақ елдеріне ұшуға қатысты «Қара тізімдегі» барлық шектеулерді алып тастады. Халықаралық азаматтық авиация ұйымы кеңесінің президенті Сальваторе Шаккитаноның алғашқы ресми сапары Қазақстан мен ИКАО арасындағы ынтымақтастықтың жаңа кезеңі болмақ. Вице-министрдің айтуынша, авиациялық оқиғаларды тергеу ИКАО ұшу қауіпсіздігін бағалау үшін аса маңызды сегіз критикалық көрсеткіштің бірі және Қазақстанда бұл көрсеткіш 51%-ды құрайды. Басқа көрсеткіштердің ішінде ол ең төмен болып қала береді.
Авиацияны дамыту: Қазақстанда жаңа әуежайлар салынып, әуе қатынасы кеңейтілуде.
Мемлекет басшысының тапсырмасы бойынша Қатонқарағай, Зайсан және Кендірлі курорттық аймақтарында шағын өңірлік авиацияның жаңа әуежайларын салу жобалары іске асырылуда. Құрылыс маусымының ашылуына барлық қажетті дайындық жұмыстары жүргізіліп жатыр. Әуежайлар ұзындығы 2 мың метрден асатын ұшу-қону жолақтарымен жабдықталатын болады. Үкімет отырысында көлік вице-министрі Талғат Ластаев хабарлағандай, жаңа бағыттарға қызмет көрсету үшін сыйымдылығы 74 жолаушыға дейін ATR-72 және Q-400 Bombardier өңірлік ұшақтары пайдаланылатын болады. Олар Өнеркәсіпті дамыту қорының тетіктері арқылы сатып алынады. Басты міндет – Алматы, Астана және басқа да ірі қалалардан осы әуежайларға тікелей, халыққа қолжетімді әуе қатынасын ұйымдастыру. Сонымен қатар мемлекет жыл сайын 26 әлеуметтік маңызы бар әуе бағытын субсидиялайды. Олардың ішінде Үшарал, Үржар, Түркістан, Ақтау және басқа да танымал туристік қалаларға бағыттар бар. Өткен жылы Үшарал, Үржар және Балқаш қалаларындағы шағын авиация терминалдары мен әуеайлақтарын жөндеу жұмыстары аяқталды.
2025 жылы 16 жаңа халықаралық бағыт жоспарланған. Азаматтық авиация академиясы жыл соңына дейін қазақстандық ұшқыштар мен инженерлерді даярлау үшін Еуропалық авиациялық қауіпсіздік агенттігінің сертификатын алуды жоспарлап отыр. Жыл сайын салаға 500-600 жаңа маман қажет, қазір Қазақстанның азаматтық авиациясында 23 мың адам жұмыс істейді.
Дереккөз: https://t.me/KZgovernment
