Қазақстан өңірлік авиациялық хабты құру үшін кадрлар даярлау мәселесін күшейтуге назар аударады.
Азаматтық авиация академиясында Көлік министрі Марат Қарабаев, Ғылым және жоғары білім министрі Саясат Нұрбек және авиация саласындағы кәсіпорындар мен серіктестік ұйымдардың басшылары қатысқан оқу-әдістемелік бірлестіктің кеңейтілген отырысы мен салалық кеңес өтті.
Кеңес барысында авиациялық мамандарды даярлаудың стратегиялық бағыттары, білім беру бағдарламаларын халықаралық стандарттарға сәйкестендіру және саладағы кадр тапшылығын шешу шаралары талқыланды.
Салаға жыл сайын 600-ден астам жаңа маман қажет, олардың ішінде ұшқыштар, инженерлер, диспетчерлер, логистер, қауіпсіздік және пилотсыз жүйелер мамандары бар.
«Мемлекет басшысының тапсырмасына сәйкес, Шығыс Қазақстан облысындағы Зайсан және Қатонқарағай аудандарында екі жаңа әуежайдың құрылысын бастадық. Осындай жұмыстар Маңғыстау облысындағы Кендірліде де жүргізіледі. Сонымен қатар, Арқалық қаласы әуежайының жұмысын қайта қалпына келтіру қажет. Жаңа әуежайлар болашақта 1000-ға жуық тұрақты жұмыс орнын құруға мүмкіндік береді, бұл үшін әрине кәсіби мамандар қажет», — деді Марат Қарабаев.
Азаматтық авиация академиясы — Қазақстанда ICAO, IATA, AVSEC стандарттарына сәйкес мамандар дайындайтын жалғыз жоғары оқу орны. Қазіргі таңда мұнда бакалаврлар, магистранттар мен докторанттар қатарында 2000-нан астам студент білім алуда.
Академия білім беру моделін трансформациялау бойынша бірқатар бастамалар ұсынды: EASA (Part-FCL және part-66) стандарттарын енгізу, бағдарламаларды ағылшын тілінде іске қосу, ұшқышсыз авиациялық жүйелер орталығын дамыту, оқыту процесін цифрландыру және дуальды білім беру форматын кеңейту.
